ԵՐԵՎԱՆ, 2 ՄԱՅԻՍԻ, ԱՐՄԵՆՊՐԵՍ։ Չինաստանի Գուանդունի նահանգում արագընթաց մայրուղու փլուզման հետևանքով 36 մարդ է զոհվել, 30 մարդ՝ վիրավորվել։ Այս մասին հաղորդում է «Արմենպրես»-ը՝ վկայակոչելով Xinhua գործակալությունը։

Միջադեպը տեղի է ունեցել մայիսի 1-ին, տեղի ժամանակով գիշերվա 2։10-ին՝ հորդառատ անձրևների պատճառով։ Մեյչժոու-Դաբու մայրուղու փլուզված հատվածի երկարությունը 17,9 մետր է։ Փլուզման հետևանքով 23 մեքենա է ընկել ճանապարհից։

Մեյչժոուի հատվածում ապրիլի վերջից հորդառատ անձրևներ և կարկուտներ են տեղում, որոնք առաջացրել են վտանգավոր սողանքներ, հեղեղել են տները և ավիրել կամուրջներ։

Չինաստանի նախագահ Սի Ծինփինը կոչ է արել բոլոր ջանքերը գործադրել նահանգում շարունակվող անձրևոտ եղանակի վտանգները վերացնելու համար։

Ըստ Չինաստանի պետական հեռուստատեսության՝ փրկարարական աշխատանքներում ներգրավված է մոտ 500 մարդ։